Jasóspirimniń ústine qaqpa qulady: polıtsııa tergeý júrgizip jatyr

QOSTANAI. QazAqparat - Qostanaıda 16 jastaǵy balanyń ústine fýtbol qaqpasynyń qulaý faktisi boıynsha sotqa deıingi tergeý júrip jatyr, dep habarlaıdy QazAqparat tilshisi.

«Qostanaıda qalalyq polıtsııa basqarmasyna kámelettik jasqa tolmaǵan balanyń ústine fýtbol qaqpasynyń qulaý faktisi tirkeldi. Qazirgi ýaqytta QR Qylmystyq kodeksiniń 371-baby 2-bóligi «Nemquraılylyq» faktisi boıynsha sotqa deıingi tergeý jumystary júrgizilip jatyr» dep habarlady polıtsııanyń baspasóz qyzmetinen.

Qajetti tergeý sharalary kesheni júrgizilýde.

Oblystyq densaýlyq saqtaý basqarmasynda habarlaǵandaı, zardap shegýshini Nur-Sultanǵa jetkizý týraly sheshim qabyldanǵan. Dúısenbi kúni ony sanavıatsııamen Ana men bala ortalyǵyna jetkizedi. Dárigerler onyń jaǵdaıyn aýyr dep baǵalap otyr. Bala jasandy jolmen tynys alyp jatyr.

Eske salaıyq, Qostanaıda fýtbol qaqpasynyń qulaýy saldarynan 16 jastaǵy bala zardap shekti. Qazir ol aýyr halde aýrýhanada jatyr. Jasóspirimge birneshe ret ota jasaldy.