Qoldanýshy baptaýlary
Qoldanýshy baptaýlary
+7 (701) 759 90 19 Lenta
USD 421.58 EUR 496.83
RUB 5.53 CNY 62.20
Jańalyqtar

Ulttyq banktiń qaıta uıymdastyrylýymen qurylatyn agenttiktiń mindetine ne kiredi

2019 jylǵy 24 maýsym 12:44 2232
Bólisińiz:
Ulttyq banktiń qaıta uıymdastyrylýymen qurylatyn agenttiktiń mindetine ne kiredi

NUR-SULTAN. QazAqparat - QR Parlamenti Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine qarjy naryǵyn retteý men damytý, mıkroqarjylyq qyzmet jáne salyq salý máseleleri boıynsha ózgerister men tolyqtyrýlar engizý týraly» Zańy eki oqylymda qaralyp, qabyldandy, dep habarlaıdy QazAqparat tilshisi.

«Qarjy naryǵyn retteý jáne damytý, sondaı-aq tutynýshylardyń quqyqtaryn qorǵaý fýnktsııalaryn Qazaqstan Prezıdentine tikeleı esep beretin jeke memlekettik organǵa berý usynylyp otyr. Osy bastamany iske asyrý maqsatynda atalǵan zań jobasy ázirlendi. Zań jobasynda eki aýqymdy baǵyt qamtylǵan. Birinshi baǵyt - qarjy sektoryn retteýdiń jáne damytýdyń táýelsiz organyn qurý. Eldiń ekonomıkalyq ósýin yntalandyrý úshin Ulttyq bank ortalyq banktiń klassıkalyq qyzmetterine  shoǵyrlanýǵa nıetti. Bul baǵa turaqtylyǵyn qamtamasyz etý, aqsha-kredıt saıasaty, valıýtalyq retteý jáne tólem júıelerin damytý. Al qarjy naryǵyn retteý men damytý, sondaı-aq tutynýshylardyń quqyqtaryn qorǵaý fýnktsııalaryn Qarjy naryqtaryn retteý men damytý agenttigine berý usynylyp otyr», - dedi QR Ulttyq bankiniń tóraǵasy Erbolat Dosaev.

Onyń sózine qaraǵanda,  ekonomıkany sapaly damytý úshin Ulttyq bank memlekettik-qarjylyq qoldaý baǵdarlamalaryn, onyń ishinde ekonomıkanyń basym salalaryn nesıeleý baǵdarlamasyn, «7-20-25» ıpotekalyq baǵdarlamasyn jáne basqa da baǵdarlamalardy ekinshi deńgeıli bankter arqyly iske asyrýdy jalǵastyrady. Agenttik óz tarapynan qarjy naryǵyndaǵy qarjy resýrstaryn bólý tıimdiligin arttyrýǵa, jańa qarjy ónimderi men qyzmetterin engizýge, olardyń halyq pen bıznes úshin qoljetimdigin arttyrýǵa yqpal etedi.

UB men jańa agenttiktiń qyzmeti tyǵyz úılesedi. Qarjylyq turaqtylyqty qamtamasyz etý maqsatynda Ulttyq bank pen agenttik Qarjylyq turaqtylyq jónindegi keńestiń qyzmeti sheńberinde ózara is-qımyl jasaıdy. Jańa agenttik Ulttyq bank sııaqty QR Prezıdentine tikeleı esep beretin bolady, respýblıkalyq bıýdjet esebinen  qarjylandyrylady. Agenttik Ulttyq bankti qaıta uıymdastyrý arqyly qurylady. Onyń barysynda qyzmetter, ókilettikter men shtat birlikter qaıta bólinedi. UB-dan agenttikke aýysýy boljanyp otyrǵan qyzmetkerleriniń jalpy sany shamamen 500 adam bolady.

Zań jobasynyń ekinshi baǵyty bul - tutynýshylyq kredıtteý naryǵynda retteýshi arbıtraj jáne júıelik problemalardy joıý.

«Halyqtyń boryshtyq júktemesiniń baqylanbaı ósýine jol bermeý maqsatynda barlyq kredıtteý sýbektilerine qatysty tıisti retteý men qadaǵalaý quraldaryn engizý talap etiledi. Qazirgi ýaqytta rettelmeıtin sýbektilerdiń sany shamamen 2 myńǵa jetti», - dedi  ol.

Búginde tutynýshylyq kredıtter portfeliniń neǵurlym belsendi ósýi rettelmeıtin sektorda baıqalady - ol onlaın-kredıtorlar, kredıttik seriktestikter jáne lombardtar. Sonymen qatar, rettelmeıtin sýbektiler tarapynan qaryz alýshylardyń  quqyqtary men múddeleriniń buzylýy baıqalady.

«Atalǵan problemalardy sheshý úshin qadaǵalaý organynyń retteý aýqymyna kredıtteýdiń barlyq sýbektilerin engize otyryp, ony keńeıtý usynylady. Zań jobasynda banktik emes kredıttik uıymdardy retteýdiń saralanǵan júıesin engizý kózdeledi», - dedi E. Dosaev.

Ulttyq Bank tóraǵasy zań jobasynda  árbir kórsetilgen sýbektiniń qoldanystaǵy bıznes-úlgisin ózgertý kózdelmeıtinin, tek qyzmettiń naqty túrine tán táýekelderge baılanysty talaptar engiziletinin atap ótti.

Budan buryn habarlanǵandaı, Qazaqstanda qarjy naryǵyn retteıtin jańa agenttik qurý josparlanyp otyr.

 

 

Bizdiń kanalymyzǵa jazylyńyz:

Bólisińiz:

Avtor:

Rýslan Ǵabbasov

Zagrýzka...
Pikir qaldyrý
+7
Jiberý
ONLAIN QYZMETKERLER
MURAǴAT