Týǵan kúnge arystannyń alanyn syılaý sánge aınaldy - basqarma basshysy

ALMATY. QazAqparat - Janýar syılaý dástúrin toqtatý qajet. Bul týraly qalalyq mádenıet basqarmasynyń basshysy Nurlan Sydyqov aıtty, dep habarlaıdy QazAqparat.

«Týǵan kúnge arystannyń alanyn syılaý sánge aınaldy. 4 aıdan soń oıynshyq kerek bolmaı qalady. Ony qaıda jiberedi? Osydan problema bastalady. Olardy  kútip baǵý kerek. Ol bolmasa, janýar aýyra bastaıdy. Adamdar janýarlardy óziniń jan raqaty nemese paıda úshin ustaýdy doǵarýy kerek», - dedi N.Sydyqov Almaty zoobaǵynda ótken jıynda.

Basqarma basshysy búginnen bastap zoobaq eshqandaı janýardy qoldan ári qujatsyz qabyldamaıtynyn jetkizdi.

«Qujatsyz, ekpesiz, densaýlyǵy týraly resmı dáıektersiz eshqandaı janýar endi zoobaqqa qabyldanbaıdy. Buǵan deıin biz qujatsyz qabyldamaımyz degen kezde, qansha adam bizge narazylyq bildirgen bolatyn. Alaıda, biz aıypty bolmas úshin endi eshbir janýar tıisti tártipsiz alynbaıdy», - dedi Nurlan Sydyqov.