Syǵanaqty zertteý barysynda birqatar jańa derekter anyqtaldy

QYZYLORDA. QazAqparat - Qyzylorda oblysynyń Jańaqorǵan aýdany aýmaǵynda oryn tepken Syǵanaq qalashyǵynda bıyl arheologııalyq zertteý barysynda ǵalymdar birqatar jańa derekti anyqtady, dep habarlaıdy QazAqparat tilshisi.

Arheologııalyq zertteý sharasy Tuńǵysh Prezıdent - Elbasy Nursultan Nazarbaevtyń «Bolashaqqa baǵdar: rýhanı jańǵyrý» jáne «Uly dalanyń jeti qyry» maqalalary aıasynda júrgizildi. Osy oraıda, Qyzylorda oblysynyń Mádenıet, arhıvter jáne qujattama basqarmasy bıylǵy jylǵy 16 qańtarda Qoja Ahmet ıAsaýı atyndaǵy halyqaralyq qazaq-túrik ýnıversıtetimen memorandým jasady. Onyń aıasynda Syǵanaq qalashyǵynda zertteý, saqtaý jáne paıdalaný baǵytynda maýsym aıynda arheologııalyq zertteý sharalary júzege asty.

Qazba jumystary Qoja Ahmet ıAsaýı atyndaǵy halyqaralyq qazaq-túrik ýnıversıteti arheologııa ǵylymı-zertteý ınstıtýtynyń bas ǵylymı qyzmetkeri, tarıh ǵylymdarynyń doktory, professor Sáıden Joldasbaevtyń jetekshiligimen júrgizildi. Ekspedıtsııaǵa Arheologııa ǵylymı-zertteý ınstıtýtynyń qyzmetkerleri, tarıh kafedrasynyń stýdentteri jáne Qyzylorda oblystyq mádenıet, muraǵat jáne qujattama basqarmasyna qarasty «Oblystyq tarıhı jáne mádenı eskertkishterdi qorǵaý»  mekemesiniń mamandary qatysty.

«Syǵanaq qalasy - Syrdyń orta aǵysyndaǵy astanalyq mártebege ıe ortaǵasyrlyq qala ekendigi belgili. Sondyqtan qala aýmaǵynda ár kezeńniń bı-sultandary men handary jerlengen iri keseneler orny kóptep kezdesedi. Bıyl memorandým boıynsha jasalǵan arheologııalyq qazba jumystarynyń nátıjesinde qalashyqtyń batys bóliginde ornalasqan tóbeniń kesene ekendigi anyqtalyp otyr. Qazba barysynda tabylǵan syrly qysh qaptamalarǵa, keramıkalyq ydystarǵa jáne qyshtardyń pishinderine qarap, bul qurylys XIII-XIV ǵasyrlarǵa jatatyndyǵy týraly aldyn ala boljaýǵa bolady», - dedi ekspedıtsııa jetekshisi Sáıden Joldasbaev.

Aldaǵy ýaqytta kóne qalashyqta  tolyqqandy qazba jumystaryn jalǵastyrý josparlanyp otyr. Bul ıgilikti isterdiń ortaǵasyrlyq Syǵanaq qalasyn murajaıǵa aınaldyrý baǵytynda qosatyn úlesi óte joǵary bolady.

Budan buryn Syǵanaq qalashyǵyn UNESCO Dúnıejúzilik muralar tizimine engizý josparlanyp otyrǵanyn habarlaǵan edik.