Shyǵys Qazaqstan: 40 myń gektar jer eshkimge satylmaıdy

 ÓSKEMEN. QazAqparat - «Altaınıýs» saıtynda jarııalanǵan Shyǵys Qazaqstan oblysynda qus fabrıkasy salynatyny týraly maqalaǵa qatysty oblystyq jer qatynastary basqarmasynyń basshysy Vıktorııa Barsýkova pikir bildirdi, dep habarlaıdy QazAqparat ShQO ákimdigine siltememen.

Onyń aıtýynsha, eshqandaı jer sheteldik ınvestorlarynyń qolyna berilgeli turǵan joq. Jer satylmaıdy.

«Qazirgi ýaqytta Úrjar aýdanynyń aýmaǵynda 300 ga jer memlekettik rezervten shyǵarylǵan. Osy eki ýchaskege qus fabrıkasyn salý josparlanǵan. Aýqymdy qurylys jumystaryna qazaqstandyqtarmen qatar sheteldik ınvestorlar da qatysa alady. Jerdi satý týraly eshqandaı áńgime joq. Sonymen qatar Úrjar aýdanynda 40 myńǵa jýyq gektar aýylsharýashylyq telimderi qus fabrıkasynyń jemshóp qoryn qamtamasyz etý maqsatyna memleket menshiginde saqtalyp tur», - deıdi V.Barsýkova.

Basqarma basshysynyń sózine sensek, joǵaryda aıtylǵan 40 myń gektar jer burynǵydaı memleket menshiginde qala bermek. Atalǵan aýmaqqa bolashaqta salynatyn qus fabrıkasynyń azyǵy, ıaǵnı taýyq jemine arnalǵan dándi daqyldar egiledi. Zań boıynsha bul jerler memleket menshiginde, sondyqtan atalmysh ýchaskelerdi satýǵa nemese sheteldikterge berýge eshkimniń eshqandaı quqyǵy joq. Jer tek qana Qazaqstan azamattaryna nemese sheteldiń qatysýynsyz zańdy tulǵalarǵa ǵana beriledi.

«Áleýmettik jelilerde 40 myń gektar jerdiń sheteldikterge beriletini týraly aqparat tarap, halyq arasynda alýan túrli pikir aıtylyp jatqany belgili. ShQO jer qatynastary basqarmasy atalmysh aqparattyń jańsaq ekenin jáne eshqandaı shyndyqqa janaspaıtynyn málimdedi», - delingen ákimdik taratqan habarlamada.