Qoldanýshy baptaýlary
Qoldanýshy baptaýlary
+7 (701) 759 90 19 Lenta
USD 412.55 EUR 468.66
RUB 5.79 CNY 58.80
Jańalyqtar

Sheteldegi qazaq balalary arasyndaǵy baıqaý jeńimpazdary Qazaqstanǵa keledi

2019 jylǵy 21 maýsym 10:50 839
Bólisińiz:
Sheteldegi qazaq balalary arasyndaǵy baıqaý jeńimpazdary Qazaqstanǵa keledi

NUR-SULTAN. QazAqparat - Shetelde turatyn qazaq dıasporasy oqýshylary arasynda ótken «Uly Dala Eli» atty ádebı baıqaýdyń qorytyndysy shyqty, dep habarlaıdy QazAqparat «Otandastar» qorynyń baspasóz qzymetine silteme jasap.

Halyqaralyq baıqaýǵa shyǵarmashylyq jumystar 2019 jyldyń 1 sáýirinen bastap 30 mamyrǵa deıin qabyldandy. 2019 jyldyń 1 maýsymynan bastap 10 maýsymǵa deıin qazylar alqasy kelip túsken jumystardy saraptap, qorytyndy shyǵardy. Konkýrsta mynadaı taqyryptar qamtyldy: «Men qazaqpyn!», «Qazaqstan, meniń jerim, týǵan ólkem!», «Otanmen rýhanı baılanys tili», «Dástúr - rýhanı ómirdiń negizi».

Baıqaýǵa qatysqan balalardyń І jas toby boıynsha baıqaýǵa - 19 jumys, ІІ jas toby boıynsha - 15 jumys kelip túsken. Bas-aıaǵy 34 jumysty komıssııa músheleri saraptap, 10 baldyq júıemen baǵalady. Komıssııa eń basty krıterıı retinde jumystyń taqyrybyna jáne negizgi ıdeıasyna sáıkestigi, taqyryptyń tolyq ashylýy jáne oıdyń berilý tásili sııaqty krıterıılerge súıene otyryp, qorytyndy shyǵardy.

«Jalpy, jumystardyń barlyǵy da taqyrypqa saı jazylǵan, balalar negizgi ıdeıany ashýǵa tyrysqan. Essege qoıylatyn talaptardyń barlyǵyn saqtaı otyryp, ózindik oı-tujyrymdaryn erekshe tásilmen bere bilgen oqýshylar da bar. Ásirese, І jas tobynda (13-15 jas aralyǵyndaǵy balalar) Soltanov Raıhat, Asylbasheva Kamılıa, Baıtýlla Batanuly, Súleımenov Masalım sııaqty jas talanttardyń, sol sııaqty ІІ jas tobynda (16-18 jas aralyǵyndaǵy oqýshylar) Erkinbek Aqtoty, Amenova Alıma, Bektur Abdýlhakım, Hastı Abdolázız syndy jetkinshekterdiń eńbekterin erekshe atap ótkimiz keledi» - deıdi qazylar alqasynyń múshesi Aınur Amangeldiqyzy.

Saraptama komıssııasynyń sheshimi boıynsha baıqaýǵa qatysqan 13-15 jas aralyǵyndaǵy balalardyń eńbekteri bólek, 16-18 jas aralyǵyn qamtıtyn jetkinshekterdiń eńbekteri bólek baǵalandy.

Júldegerler:

І jas toby - 13-15 jas aralyǵy boıynsha:

1-oryn -Soltanov Raıhat

2-oryn - Asylbasheva Kamılıa

3-oryn - Baıtýlla Batanuly

4-oryn - Súleımenov Masalım

ІІ jas toby 16-18 jas aralyǵy boıynsha:

1-oryn - Erkinbek Aqtoty

2-oryn - Hastı Abdolázız

3-oryn - Amenova Alıma

4-oryn - Bektur Abdýlhakım

Jeńiske jetken 4 úzdik jumys avtorlary Soltanov Raıhat (Reseı), Asylbasheva Kamılıa (Shvetsııa), Erkinbek Aqtoty (Mońǵolııa) men Hastı Abdolázız (Iran) atamekeni - Qazaqstan Respýblıkasyna joldama jeńip aldy.

«Biz aınalamyzdaǵy basqa ult ókilderine qazaqtyń kim ekenin tanytyp, salt-dástúrimizdi kórsetýge tyrysamyz. Naýryz meıramy, Qurban aıt, qazaǵymyzdyń kóptegen tól merekelerin toılap, ulttyq kıimderimizdi kıip, jıi kórisip turamyz. Qazaqstannyń týy osyndaǵy árbir qazaqtyń úıiniń tórinen oryn alǵan. Sherte almasaq ta, «naǵyz qazaq - dombyra» únemi qasymyzda júredi. Mektepte oqyp júrgen kezde balalarmen Qazaqstanǵa barsaq, ne isteıtinimiz týraly kóp aıtatynbyz. Sondaǵy oı-armandarymyzdy esime alsam, áli kúnge sheıin kózim móldirep, qýanyshtyń jasyna tolady. Elime barǵan kezde onyń topyraǵyn súıý, jerine bas ıip «Assalaýmaǵaleıkým» dep sálemimdi berip, keń-baıtaq jerimniń gúli men jýsanyna toly aýasyn ıiskep, ómirge jańa kelgen nárestege uqsap bastan jańa bir sezimdi keshirgim keletin. Sol arman oryndaldy», - deıdi Gorgan qalasynan (Iran) Hastı Abdolazız tarıhı otanyna degen yqylasyn bildirip.

Astana kúnin merekeleý aıasynda baıqaý jeńimpazdaryna Nur-Sultan qalasyna jáne «Býrabaı» memlekettik ulttyq tabıǵı parkine bes kúndik joldama berildi.

 

 

 

Bizdiń kanalymyzǵa jazylyńyz:

Basty sózder: Qandastar, Ádebıet,
Bólisińiz:
Zagrýzka...
Pikir qaldyrý
+7
Jiberý
ONLAIN QYZMETKERLER
MURAǴAT