Radıkaldy ıdeologııa qoǵam men memleket úshin qaýipti - teolog

ALMATY. QazAqparat - Radıkaldyq ıdeologııa kez kelgen qoǵam men memleket úshin qaýipti. Ol ultaralyq, dinaralyq arazdyqty týdyryp, birlik pen yntymaqqa zııan keltiredi. Búgin Almatyda ótken semınar barysynda teolog, ıslamtanýshylar osyndaı pikirimen bólisti, dep habarlaıdy QazAqparat tilshisi.

BAQ ókilderine arnalǵan dinı ekstremızm men terrorızmniń aldyn alý  semınaryna jınalǵandar radıkaldy dinı aǵymnan  keletin qaýipti talqylady.

«Dinı radıkalızmdi obekt jáne sýbekt dep ekige bólýge bolady. Obekt - ol radıkaldyq  ıdeologııany qoldaıtyn adam. Sýbekt - ony raıynan qaıtaratyn mamandar. Osy ýaqytqa deıin psıholog, pedagog, quqyq qorǵaý organdary men teologtar jumys istep keledi. Báriniń oıy men maqsaty bir - adasqan adamdy raıynan qaıtarý. Mamandardyń júrgizgen zertteýi boıynsha BAQ ókilderi men otbasy músheleriniń de róli zor. Tilshiler men jaqyn týystary da sýbekt bola alady. Sondaı-aq, jumyspen qamtý ortalyqtarynyń da úlesi bar. Sebebi, osy radıkaldy dinı ıdeologııany tańdaýǵa áleýmettik másele de áser etýi múmkin», - deıdi ıslamtanýshy Asqar Sabdın.

Qazirgi tańda Qazaqstanda dinı ekstremızmniń aldyn alýda eń negizgi sýbekt  -   memleket bolyp tur. Osy baǵytta júrgizilip otyrǵan memlekettik saıasattyń basty maqsaty - Qazaqstandy jat dinnen saqtaýǵa uıytqy bolý.

Radıkalızm - belgili bir kózqarasty ustaný, tek sony jaqtaý degen maǵynany bildiredi. Jat aǵymdardyń taralýy dinı saýtsyzdyqtan bolyp jatyr. Ǵalamtor keńistigindegi teris din aǵymyna jeteleıtin  ınternet saıttardyń da áseri bar deıdi mamandar.

«Elimizdegi dástúrli dinimizge kóleńke túsiretin saıttardyń, áleýmettik jelilerdiń jaýapkershiligin qataıtý qajet. Qazir ınternetti ashsań boldy, túrli beınejazbany kórýge bolady. Olardy jaýyp tastaýǵa túrli áreketter jasalǵanymen, tolyqtaı qutyla almaı otyrmyz. Alaıda, tyıym salynǵan saıttar bar. Oǵan kirgen nemese aqparatpen bóliskender jaýapkershilikke tartylady», - dedi Asqar Sabdın.

Aıta ketý kerek, Almatyda búginnen bastap  memlekettik tapsyrys aıasynda Almaty qalasy qoǵamdyq damý basqarmasy memlekettik mekemesiniń qoldaýymen dinı ekstremızm men terrorızmniń aldyn alý taqyrybynda maqala jazatyn jýrnalısterge arnalǵan semınar bastaldy. Semınarda bilikti mamandar, teologtar, qoǵamtanýshy sarapshylar óz bilimimen bólisip jatyr.