Muǵalimder men dárigerlerge bastapqy jarnasyz páter berilmek

NUR-SULTAN. QazAqparat - Qazaqstan ıpotekalyq kompanııasy men QR DSM, QR BǴM arasynda «Nurly jer» baǵdarlamasy boıynsha satyp alý quqyǵymen turǵyn úılerdi jalǵa berý týraly kelisimderge qol qoıyldy, dep habarlaıdy QazAqparat tilshisi.

Atalǵan kelisimder arqyly mınıstrlikter men vedomstvolyq baǵynysty uıymdardyń qyzmetkerlerin turǵyn úımen qamtý josparlanǵan.

Atalmysh baǵyttaǵy qyzmetti qarjylandyrýǵa shamamen 40 mlrd teńge «QIK» IU» AQ menshikti qarajaty men naryqtyq talaptarǵa sáıkes, qaryzǵa alynǵan qarajat jumsalatyn bolady. Osyǵan sáıkes, baǵdarlamany iske asyrý memlekettik bıýdjetke qosymsha salmaq salmaıdy.

Qatysýshylar úshin jalǵa beriletin turǵyn úıdi ótkizý talaptary mynadaı: turǵyn úıdi jaldaý merzimi 20 jyl. Baspana bastapqy jarnasyz beriledi. Turǵyn úıdi kez kelgen ýaqytta jáne aıyppul sanktsııalaryn qoldanýsyz merziminen buryn satyp alý múmkindigi bar. Kiris jetkiliksiz bolǵan jaǵdaıda kepilgerlerdi tartý múmkindigi de qarastyrylǵan. Bul rette baǵdarlama boıynsha jalgerlik tólemniń ortasha aılyq quny respýblıka boıynsha ortasha baǵadan tómen bolmaq.

«Qazaqstan ıpotekalyq kompanııasy bilim berý jáne densaýlyq saqtaý salasynyń qyzmetkerleri úshin turǵyn úıdi ıpotekalyq nesıelendirý boıynsha arnaıy baǵdarlama ázirledi. Kompanııamyz 2015 jyldan beri satyp alý quqyǵymen jalǵa beriletin turǵyn úıler salý men satyp alýdy qarjylandyryp keledi. Osy kezge deıin biz Qazaqstan boıynsha 18 myńnan astam otbasyn turǵyn úımen qamtamasyz ettik. Kompanııanyń osynaý tájirıbesi osy áleýmettik mańyzy bar jobany nátıjeli iske asyrýǵa múmkindik beredi degen senimdemiz», - dedi «QIK» IU» AQ Basqarma tóraǵasy Ádil Muhamedjanov OKQ-a ótken baspasóz máslıhatynda.
 

Turǵyn úı alýǵa úmitkerler tizimin tikeleı mınıstrlikter quratyn bolady. Óz kezeginde «QIK» IU» AQ berilgen qyzmetkerlerdiń tólem qabilettiligin tekserip, baǵalaý qorytyndysy boıynsha ótinimderi maquldanǵan úmitkerlermen uzaq merzimdi jaldaý shartyn bekitedi.

Baǵdarlamany iske asyrý arqyly aldaǵy eki jylda 3 myń qazaqstandyq otbasyn menshikti turǵyn úımen qamtamasyz etý josparlanyp otyr.

Aıta ketek, kelisimge OQK-da ótken baspasóz máslıhatynda QR Densaýlyq saqtaý mınıstri Eljan Birtanov, QR Bilim jáne ǵylym mınıstrliginiń jaýapty hatshysy Aryn Orsarıev, «QIK» IU» AQ Basqarma tóraǵasy Ádil Muhamedjanov qol qoıdy.