«Kúltegin» anımatsıalyq fılminiń treıleri jarıalandy

ASTANA. QazAqparat - SH.Aımanov atyndaǵy «Qazaqfılm» kınostýdıasy «Kúltegin» tolyqmetrajdy anımatsıalyq fılminiń treılerin jarıalady, dep habarlaıdy QazAqparat tilshisi.

QR Mádenıet jáne sport mınıstrliginiń tapsyrysy boıynsha jaryqqa shyqqan bul týyndy jalpyulttyq prokatqa 22 qarashada jol tartady.

Jas rejısser-anımator Adaı Ábildanyń qolynan shyqqan atalmysh tarıhı anımatsıalyq týyndy kóshpendi halyqtardyń basyn biriktirip, Uly kóshpendilerdiń dástúrin jalǵastyrǵan Túrik qaǵanatynyń dańqty áskerı qolbasshysy Kúlteginniń jastyq shaǵy týraly baıandaıdy.

«Kúltegin» fılmi ata-babalarymyzdyń janqıarlyq erligi, birligi men aýyzbirshiligi týraly. Kúltegin - tutas bir dáýirdiń tarıhı tulǵasy. Sondyqtan da bizdiń basty maqsatymyz - sol kezdegi mádenıetti ashyp kórsetý ǵana emes, sonymen qatar mýltıplıkatsıa arqyly jas kórermenderimizdiń tarıhqa degen qyzyǵýshylyǵyn arttyrý, - dedi Adaı Ábilda.

Jas urpaqty meıirimdi, qaıyrymdy bolýǵa, sonymen qatar Otandy súıýge tárbıeleýdi maqsat etken rejısser Adaı Ábildanyń osyǵan deıin de túsirgen qysqametrajdy fılmderi kóptegen Halyqaralyq festıvalarda qoyilip, júldeli oryndardan kóringen.

«Ókinishke qaraı, búginde otandyq telearnalar negizinen balalarymyzǵa teris tárbıe beretin sheteldiń mýltfılmderin kórsetip júr. Sońǵy kezderi balalardy meıirimdilikke shaqyratyn mýltfılmder joqtyń qasy. Ol fılmderde ádemi ashyq boıaýlar da, jarylystar da, qyzyqty keıipkerler de bar, biraq eń bastysy - mán-maǵynasy joq. Bundaı úrdisti toqtatý qajet. Ózimizding ulttyq keıipkerlerimiz kerek, - dedi rejısser.

«Kúltegin» anımatsıalyq fılminiń treılerin myna siltemeden kórýge bolady.