QR Prezıdenti halyqtyń ekologııalyq mádenıettiligin arttyrýǵa shaqyrdy

 NUR-SULTAN. QazAqparat - Memleket basshysy Ekologııa, geologııa jáne tabıǵı resýrstar mınıstri Maǵzum Myrzaǵalıevti qabyldady, dep habarlaıdy Aqorda.

Qazaqstan Prezıdentine mınıstrliktiń qazirgi jumystary, sondaı-aq, jańa Ekologııalyq kodekstiń ázirlený barysy týraly málimet berildi. Mınıstr geologııa salasyn damytý, sý resýrstaryn únemdeý, ormandardy jáne janýarlar álemin qorǵaý úshin qabyldanǵan sharalar jóninde esep berdi.
 

Memleket basshysy qatty turmystyq qaldyqtarǵa qatysty máselelerdi sheshý, sonyń ishinde synaq alańdaryn ekologııalyq jáne sanıtarlyq talaptarǵa sáıkestendirý, sondaı-aq, qatty turmystyq qaldyqtardy shyǵarý jáne qaıta óńdeý salasynyń ınvestıtsııalyq tartymdylyǵyn kúsheıtý qajettigin aıtty.

Qasym-Jomart Toqaev sý jáne ósimdik álemin qorǵaý, brakonerlikpen jáne ormandy zańsyz otaýmen kúres júrgizý máseleleri aıryqsha baqylaýda bolýy tıis ekenine toqtaldy.

Sonymen qatar, Qazaqstan Prezıdenti halyqtyń ekologııalyq mádenıettiligin arttyrýǵa jáne qorshaǵan ortany qorǵaý jumystaryna eriktilerdi tartýǵa shaqyrdy.