Qazaqstan men Qyrǵyzstan taýar aınalymyn arttyrý jóninde kelisimge keldi

NUR-SULTAN. QazAqparat - QR Premer-Mınıstri Asqar Mamınniń Qyrǵyz Respýblıkasyna resmı sapary aıasynda Qyrǵyzstan Prezıdenti Sooronbaı Jeenbekovpen kezdesýi ótti. Áńgimelesý barysynda ekijaqty saýda-ekonomıkalyq jáne ınvestıtsııalyq yntymaqtastyqtyń ózekti máseleleri talqylandy, dep habarlaıdy primeminister.kz. 

Bishkekte QR Premer-Mınıstri Asqar Mamın Qazaqstan-Qyrǵyz Úkimetaralyq keńesiniń VIII otyrysyna qatysty. 

Kelissózder barysynda ekijaqty ózara is-qımyldyń ózekti máseleleri boıynsha barynsha pikir almasylyp, perspektıvaly baǵyttar aıqyndaldy jáne saýda-ekonomıkalyq yntymaqtastyqty tereńdetýge baǵyttalǵan birlesken josparlar belgilendi. Ónerkásiptik kooperatsııa men ınvestıtsııalyq yntymaqtastyqty, sý-energetıka salasyn damytý, shekara mańy yntymaqtastyǵyn nyǵaıtý, sondaı-aq tsıfrlandyrý jáne ǵarysh salalarynda birlesken jobalardy iske asyrý máselelerine erekshe kóńil bólindi.

«Qazaqstan Respýblıkasy Qyrǵyzstannyń negizgi saýda seriktesteriniń biri. Qazaqstannyń Qyrǵyz Respýblıkasynyń taýar aınalymyndaǵy úlesi 11%-dan asady, onyń ishinde eksportta - 14%», - dedi Qyrǵyz Respýblıkasynyń Premer-Mınıstri Mýhammedkalyı Abylgazıev.

2018 jyly eki el arasyndaǵy taýar aınalymynyń kólemi 13%-ǵa ósip,  $850 mln-ǵa jýyq boldy. Qazirgi kezde Qazaqstan jáne Qyrǵyzstan Úkimetteri 2020 jylǵa qaraı ózara saýda kólemin $1 mlrd-qa deıin arttyrý úshin jumystar júrgizýde.

Óz kezeginde, QR Úkimetiniń basshysy Asqar Mamın ekijaqty jáne óńirlik saýda salalaryndaǵy edáýir áleýetti atap ótip, iskerlik ahýaldy jaqsartý jáne shaǵyn jáne orta bıznesti qoldaý arqyly ortalyq-azııalyq aımaqqa ınvestıtsııalar tartý boıynsha elderdiń birlesken kúsh-jigerin biriktirýdiń mańyzdylyǵyn jetkizdi. 

 

«Bizdiń taýar aınalymyn birshama arttyrý úshin qolda bar áleýetti ashý úshin barlyq múmkindikterimiz bar, - dedi Asqar Mamın. - Úkimetaralyq keńes otyrysynda qabyldanǵan sheshimder bizdiń elderimizdiń arasyndaǵy ózara is-qımyldy odan ári tereńdetýge qomaqty úlesin qosyp, ekijaqty ekonomıkalyq yntymaqtastyqty damytýǵa salmaqty serpin beredi».

Qazaqstan men Qyrǵyzstan ózara tıimdi yntymaqtastyqty odan ári damytýdy maqsat etedi. Úkimettik delegatsııalar taýar aınalymyn arttyrý jáne jetkiziletin taýarlardyń nomenklatýrasyn keńeıtý, ekonomıkanyń basymdyqty salalarynda birlesken kásiporyndar qurý boıynsha jumystardy jandandyrý  boıynsha ýaǵdalastyqtarǵa qol jetkizdi.

 

QR Premer-Mınıstri Asqar Mamınniń Qyrǵyzstanǵa resmı sapary aıasynda birqatar qujattarǵa qol qoıyldy:

«KazakhExport» eksporttyq saqtandyrý kompanııasy» AQ, «AAEngineering Group» JShS jáne «Global Djamgyr Maınıng» JShQ arasyndaǵy yntymaqtastyq týraly kelisim;

«Elet Agroholdıng» JShQ men «Continental Agro Trade» (kontinental  Agro Trade) JShS arasynda aýyl sharýashylyǵy óniminiń saýdasy salasyndaǵy ózara túsinistik jáne yntymaqtastyq týraly memorandým;

«Dordoı Bazary» JShS men «Continental Agro Trade» JShS arasynda  aýyl sharýashylyǵy óniminiń saýdasy salasyndaǵy ózara túsinistik jáne yntymaqtastyq týraly memorandým;

«Haıtýn» JShQ men «Continental Agro Trade» JShS arasynda  aýyl sharýashylyǵy óniminiń saýdasy salasyndaǵy ózara túsinistik jáne yntymaqtastyq týraly memorandým;

«Damý» kásipkerlikti damytý qory» AQ men «Kepildik qory» AAQ arasyndaǵy ózara túsinistik týraly memorandým;

Qazaqstan Respýblıkasy Qarjy mınıstrligi Memlekettik kirister komıteti men Qyrǵyz Respýblıkasy Úkimetiniń janyndaǵy Memlekettik salyq qyzmetiniń arasyndaǵy ekijaqty ekonomıkalyq yntymaqtastyq pen salyqtyq ákimshilik etýdiń is-qımyl jospary;

Qazaqstan Respýblıkasynyń Indýstrııa jáne ınfraqurylymdyq damý mınıstrligi men Qyrǵyz Respýblıkasynyń Kólik jáne joldar mınıstrligi arasynda avtomobıl joldaryn salý jáne jobalaý aıasynda ınfraqurylymdyq jobalardy iske asyrý salasyndaǵy yntymaqtastyq týraly memorandým;

2012 jylǵy 11 mamyrdaǵy Qazaqstan Respýblıkasynyń Úkimeti men Qyrǵyz Respýblıkasynyń Úkimeti arasyndaǵy Qazaqstan Respýblıkasy azamattarynyń Qyrǵyz Respýblıkasynyń aýmaǵynda jáne Qyrǵyz Respýblıkasy azamattarynyń Qazaqstan Respýblıkasynyń aýmaǵynda bolý tártibi týraly kelisimge ózgerister engizý týraly hattama;

Qazaqstan-Qyrǵyz Úkimetaralyq Keńesiniń VIII otyrysynyń hattamasy.