Qasym-Jomart Toqaev Vladımır Pýtınge Irkýtskidegi oqıǵaǵa baılanysty kóńil aıtty

NUR-SULTAN. QazAqparat  - Qazaqstan Prezıdenti Qasym-Jomart Toqaev Reseı Federatsııasynyń Prezıdenti Vladımır Pýtınge kóńil aıtý jedelhatyn joldady, dep habarlaıdy QazAqparat Aqordaǵa silteme jasap.

Memleket basshysy Irkýtsk oblysyndaǵy sý tasqyny saldarynan adamdardyń qaıtys bolýyna baılanysty kóńil aıtty.

«Irkýtsk oblysyndaǵy sý tasqyny saldarynan eldi mekenderdiń qıraǵany jáne adamdardyń qaıǵyly qazaǵa ushyraǵany jónindegi habardy zor kúızelispen qabyldadym. Qazaqstan halqynyń jáne jeke ózimniń atymnan qaza bolǵandardyń jaqyndary men týystaryna kóńil aıtamyn jáne olardyń qaıǵysyna ortaq ekenimizdi jetkizýińizdi suraımyn. Barlyq zardap shekkenderdiń tezirek saýyǵyp ketýine tilektespin», - delingen jedelhatta.