Qasym-Jomart Toqaev iri kompanııalardy bilimimen bólisýge shaqyrdy

NUR-SULTAN. QazAqparat - QR Úkimeti «Qazaqstandyq sheteldik ınvetorlar keńesi» qaýymdastyǵymen birge negizgi salalardaǵy quziret transfertin damytý boıynsha júıeli usynystar ázirleýi qajet. Bul týraly búgin elordada ótken Sheteldik ınvestorlar keńesiniń otyrysynda QR Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Bilim ekonomıkasy dáýirinde búkil ómir boıy bilim alý róli arta túsedi. Ásirese bul rette osy quzirettiń tasymaldaýshysy sanalatyn iri transulttyq korporatsııalarmen ózara is-qımyl mańyzdy», - dedi Qasym-Jomart Toqaev.

QR Prezıdentiniń atap ótýinshe, sońǵy úsh jyl ishinde jumys berýshilerdiń qarajaty esebinen 12 myńnan astam jas bilim aldy.

«Osy tájirıbeni biz aıtarlyqtaı keńeıtýge nıettimiz. Onyń ishinde jumys berýshilerdi yntalandyrýdy jolǵa qoıý arqyly da keńeıtý oıda bar. Búgingi kúni quziretti damytý men berý ásirese munaı-gaz-hımııa, jańa materıaldar, kásiptik qyzmetter, aqparattyq tehnologııalar syndy salalarda úlken qajettilik bolyp otyr. Bizdiń barlyq kompanııalarda biliktilik arttyrý kýrstary, daǵdylaný baǵdarlamalary, jolǵa qoıylǵan bilim berý ádistemesi, tipti korporatıvtik ýnıversıtetter bar. Osyǵan oraı QR Úkimetine «Qazaqstandyq sheteldik ınvetorlar keńesi» qaýymdastyǵymen birge biz úshin negizgi salalardaǵy quziret transfertin damytý boıynsha júıeli usynystar ázirleýdi tapsyramyn», - dedi QR Prezıdenti.