Qoldanýshy baptaýlary
Qoldanýshy baptaýlary
+7 (701) 759 90 19 Lenta
USD 378.60 EUR 417.75
RUB 6.13 CNY 54.58
Jańalyqtar

Eýropa lıgasy: «Ordabasy» grýzııalyq «Torpedonyń» osal tusyn taba ala ma

2019 jylǵy 11 shilde 08:44 590
Bólisińiz:
Eýropa lıgasy: «Ordabasy» grýzııalyq «Torpedonyń» osal tusyn taba ala ma

NUR-SULTAN. QazAqparat - Búgin fýtboldan UEFA Eýropa lıgasy birinshi irikteý kezeńinde Shymkenttiń «Ordabasy» klýby óz alańynda Grýzııanyń «Torpedo» (Kýtaısı) komandasyn qabyldaıdy, dep habarlaıdy QazAqparat tilshisi.

«Ordabasy» budan buryn da Eýropa lıgasy oıyndaryna qatysty. Shymkenttik klýb 2012/2013 jylǵy alamanda birinshi irikteý kezeńinde Serbııanyń «ıAgodına» komandasyn orta jolda qaldyryp, jarystyń kelesi satysynda Norvegııanyń «Rýsenborg» klýbyna jol berip qoıdy. Odan keıin 2015/2016 jylǵy alamannan bastap qatarynan úsh jyl atalmysh týrnırde baq synady. Degenmen, alǵashqy kezeńnen árige asa alǵan joq. «Ordabasy» 2017 jyly el birinshiliginde úzdik úshtikten kórindi. Nátıjesinde Eýropa lıgasy oıyndaryna qatysýǵa joldamaǵa qol jetkizgen edi. Degenmen, Qazaqstan fýtbol federatsııasy birqatar sebeptermen onyń ornyna Qostanaıdyń «Tobyl» komandasyn qosty.

«Torpedo» - Grýzııanyń bedeldi klýbynyń biri. Atalmysh klýb 1946 jyly Kýtaısı avtokólik zaýytynyń bazasynda tusaýyn kesti. Olar KSRO joǵary lıgasynda da birneshe márte synǵa tústi. Degenmen, úzdikter qatarynda kóp turaqtaı alǵan joq. 1990 jyldan bastap «Torpedo» óz eliniń tól birinshiliginde baq synap keledi. Búgingi kúnge deıin úzdik úshtikten jıi boı kórsetip júr. «Torpedo» 4 márte chempıon atansa, 3 márte kúmis, 6 márte qola medalge ıe boldy. Nátıjesinde  UEFA Chempıondar lıgasynda tórt márte óz eliniń namysyn qorǵady. Degenmen eshbirinde joǵary jetistikke jete almady.

«Torpedo» búginge deıin eýrokýbok oıyndarynda qazaqstandyq klýbpen bir márte joly túıisti. 2012/2013 jylǵy alamanda Eýropa lıgasynyń birinshi irikteý kezeńinde «Aqtóbemen» óz alańynda 1:1 esebimen teń oınap, syrt alańda 0:1 esebimen jeńilip qaldy. Nátıjesinde «Aqtóbe» jarystyń kelesi satysyna joldama aldy.

Byltyr «Torpedo» Eýropa lıgasynda táp-táýir nátıjege qol jetkizdi. Jarysty birinshi irikteý kezeńnen bastaǵan komanda áýeli Moldovanyń «Sherıfin», odan keıin Farer araldarynyń «Vıkıngýr», jarystyń úshinshi satysynda Albanııanyń «Kýkesı» komandasyn orta jolda qaldyrdy. Pleı-off kezeńinde Bolgarııanyń «Lýdogorets» klýbymen kezdesti. Óz alańynda qarsylasyna 0:1 esebimen jol berip, syrt alańda olardan 0:4 esebimen oısyraı jeńildi.

Qazirgi tańda «Torpedo» komandasyna jergilikti maman Kahaber Chhetıanı bapkerlik jasaıdy. Ol atalmysh klýbtyń tizginin 2016 jyldan beri ustap keledi. Komanda quramynda jergilikti fýtbolshylar oınaıdy.

«Ordabasy» men «Torpedo» (Kýtaısı) komandalary arasyndaǵy kezdesý Nur-Sultan ýaqytymen 20.00-de bastalady. Oıyn Qazsport telearnasynan tikeleı efırde kórsetiledi. Qarymta kezdesý 18 shildede ótkiziledi. Bul juptyń jeńimpazy ekinshi irikteý kezeńinde Chehııanyń «Mlada Boleslav» komandasymen 25 shilde jáne 1 tamyz kúnderi sheberlik baıqasady.

Sondaı-aq, 11 shildede Almatynyń «Qaıraty» syrt alańda Bosnııa jáne Gertsogovınanyń «Shırokı Brıeg» klýbymen sheberlik baıqasady. Kezdesý Nur-Sultan ýaqytymen 01.00-de bastalady.

Aıta ketelik, 10 shildede Qostanaıdyń «Tobyly» Eýropa lıgasy birinshi irikteý kezeńinde syrt alańda Lıýksembýrgtiń «Jeness Esh» komandasymen 0:0 esebimen teń tústi. Al 9 shildede UEFA Chempıondar lıgasy birinshi irikteý kezeńinde elordalyq «Astana» Rýmynııanyń ChFR komandasynan 1:0 esebimen basym túsken bolatyn.

 

 

Bizdiń kanalymyzǵa jazylyńyz:

Basty sózder: Sport,
Bólisińiz:

Avtor:

Ádiljan Úmbet

Zagrýzka...
Pikir qaldyrý
+7
Jiberý
ONLAIN QYZMETKERLER
MURAǴAT