Elimizde kólikterdi tehnıkalyq baıqaý ortalyqtarynyń jumysyn baqylaý kúsheıtilmek

NUR-SULTAN. QazAqparat - QR Indýstrııa jáne ınfraqurylymdyq damý mınıstrligi jalǵan tehnıkalyq baıqaý ortalyqtarymen kúresti kúsheıtpek, dep habarlaıdy QazAqparat tilshisi.

2019 jyldyń sáýirinde «Jol qozǵalysy týraly» zańǵa tehnıkalyq baıqaý operatorlarynyń baqylaý-dıagnostıkalyq jabdyqtarynan aqparat beretin arnaıy baǵdarlamalarǵa qoıylatyn talaptarǵa ózgerister men tolyqtyrýlar engizilgen bolatyn.

Búgingi tańda ol talaptar jobasy QR Ádilet mınıstrliginde memlekettik tirkeýden ótýde.

Atalmysh talaptar avtomobıldi tehnıkalyq baıqaý jelisine usynbastan qujat jasaý faktilerin boldyrmaýǵa, sondaı-aq derekterdi «qoldan» engizýdiń (fotoshop) jolyn kesýge baǵyttalǵan.

«Elimizde tehnıkalyq baıqaýdy joıý máselesi qarastyrylmaıdy. Óıtkeni merzimdi tehnıkalyq baıqaý álemdik tájirıbege saı. Eń bastysy, bul shara adam amandyǵyn, qozǵalys qaýipsizdigin qamtamasyz etýge jáne qorshaǵan ortaǵa  keletin zııandy azaıtýǵa múmkindik beredi. Basqa elderde tirkelgen kólikterge tehnıkalyq baıqaý júrgizetin tulǵalardyń qyzmetine keletin bolsaq, Indýstrııa jáne ınfraqurylymdyq damý mınıstrligi tehnıkalyq baıqaýdy uıymdastyrý jáne ótkizý tártibin qatań qadaǵalaıtyn bolady», - delingen mınıstrliktiń málimetinde.

Degenmen, tehnıkalyq baıqaý operatorlarynyń tizilimine enbese de, atalǵan qyzmetti kórsetip, tabys taýyp júrgen tulǵalardyń áreketin tekserý atalmysh mınıstrliktiń qyzmetine kirmeıdi.