DSU-ǵa múshelik bizge ne beredi?

ASTANA. QazAqparat - Bıyl elimizdiń Dúnıejúzilik saýda uıymyna kirýine baılanysty 20 jylǵa taıaý ýaqytqa sozylǵan kelissózder aıaqtalyp, Qazaqstan atalǵan álemdik uıymnyń tolyqquqyly múshesi bolyp qabyldandy.

DSU-men júrgizilgen kelissózder bizdiń elimiz úshin tabysty aıaqtaldy dep baǵalaıdy sarapshylar. Respýblıka úshin barynsha tıimdi, ásirese aýyl sharýashylyǵyn qoldaýǵa qatysty qolaıly jaǵdaılarǵa qol jetkizildi. Sonymen qatar, elimiz Eýropalyq odaq jáne Eýrazııalyq ekonomıkalyq odaq elderimen tıisti kelisimder negizinde keń kólemdi seriktestikti damytyp otyr. Bul, árıne, Qazaqstannyń álemdik eńbek bólinisine qatysa otyryp, jahandyq naryqtan óz ornyn alýyna úlken múmkindik beredi. Jáne el ekonomıkasyna quıylar ınvestıtsııa kóleminiń ósýine yqpal etedi.
Álemdik naryqqa osyǵan deıin shyǵarǵan taýary negizinen shıkizattyq ónimder bolyp kelgen elimiz kásipkerleriniń aldynda búgin jańa ýaqyt synyna jaýap berý mindeti tur. Bizdiń bıznesmenderimiz endi Eýrazııalyq ekonomıkalyq odaq elderi taýarlarymen ǵana emes, dúnıejúzindegi jetekshi kompanııalar men ozyq óndirýshilerdiń ónimderimen qatań básekelestik jaǵdaıynda jumys isteıtin bolady. Bul básekede quny qoljetimdi, sapasy joǵary taýardyń bási ozary anyq. ıAǵnı, búgingi kúni ónimdi ótimdi, óndiristi tıimdi etýdiń tetigi - otandyq taýar óndirýshilerdiń óz qolynda.
Qazaqstannyń Dúnıejúzilik saýda uıymyna kirýi aıasynda otandyq aýyl sharýashylyq taýar óndirý¬shi¬lerin tolǵandyrǵan negizgi másele - memlekettiń agro¬ónerkásiptik keshendi qarjylandyrý múmkindikteri bol-ǵandyǵy belgili. Dúnıejúzilik naryqqa kirýimen Qazaqstan ózine taýarlardyń keıbir túrlerine ke¬dendik ákelim bajdaryn tómendetý jóninde mindet¬teme qabyldady. Bul taýarlarǵa kúrish, qoı eti, jylqy eti, melıssa, záıtún maıy, shololad, taǵy basqa ónimder jatady. DSU-ǵa kirý boıynsha kelissózderde elimiz aýyl sharýashylyǵy ónimderiniń jalpy qunynyń 8,5 paıyz kóleminde aýyl sharýashylyǵyna memlekettik qoldaý kórsetý quqyǵyn ózinde qaldyrdy. Bul rette Ekonomıkalyq ıntegratsııa isteri mınıstri Janar Aıtjanova: «Sary qorjynǵa qatysty saýaldar kelissózderde óte qıyn júrdi. Ol kelissózderdiń merzimin de uzartyp jiberdi. Sebebi, bizge uıymǵa ený emes, DSU-ǵa qandaı talaptarmen kiretinimiz mańyzdy boldy. Eń basty jeńisimiz - jalpy aýyl sharýashylyǵy óniminiń 8,5 paıyz kóleminde sýbsıdııalaýdy júrgizý quqyǵy. Aıta ketý qajet, DSU-ǵa múshe memleketter úshin bul mólsherleme ádette 5%-dy quraıdy. Uıym qurylǵaly beri mundaı nátıjege tek, Qytaı men Qazaqstan qol jetkizip otyr», - dep málimdegen bolatyn.
Áıtse de, respýblıka bir taýardan tapshylyq kórmegenimen, ekinshisi kórshiles dostastyq elderinen jetkiziletinin de umytpaý qajet. Al bul eldermen bizde bajsyz rejım ornaǵan.
Atalǵan halyqaralyq uıymnyń qyzmeti aıasynda oń múmkindikterge qol jetkize otyryp, jańa táýekelderden de tys qalmaıtynymyz aıqyn. Máselen, uıymǵa múshe bolý qosymsha ınvestıtsııalardy tartýǵa, daýlardy halyqaralyq sottarda sheshýge, halyqaralyq saýda erejelerin qalyptastyrýǵa yqpal etýge jol ashady. Degenmen, bul artyqshylyqtarǵa ıe bolýmen qosa, ımporttaýshylar múmkindiginiń keńeıýin eskere otyryp, ishki naryqta básekege qabilettilikti qamtamasyz etýge daıyn bolýymyz kerek. Sondyqtan da otandyq aýylsharýashylyq taýar óndirýshilerine DSU-ǵa músheliktiń barlyq múmkindikterin paıdalana otyryp, óz ónimderiniń básekege qabilettiligin arttyrý úshin aıanbaı eńbek etýlerine týra keledi.