Atyraýda kemeler sherýi ótti

ATYRAÝ. QazAqparat - Atyraýda «Bekire-2019» iri kólemdegi balyq qorǵaý aktsııasynyń bastalýyna baılanysty kemeler sherýi ótti, dep habarlaıdy QazAqparat tilshisi.

Sherýge quqyq qorǵaý, tabıǵatty qorǵaý organdarynyń jáne shekara qyzmetiniń 11 qaıyǵy men 17 shaǵyn kemesi jumyldyryldy. 

«Bekire-2019» jyl saıynǵy iri kólemdegi balyq qorǵaý aktsııasy aıasynda uıymdastyrylǵan sý kólikteriniń sherýi 1 sáýir kúni tańǵy saǵat 10-da Balyqshy yqsham aýdanynan bastalyp, teńizge shyǵar betke deıin jalǵasty.
«Biz Kaspıı teńiziniń jaǵalaýy men sý aıdyndarynda jáne Jaıyq jáne Qıǵash ózenderiniń boıyndaǵy statsıonarlyq jáne mobıldi beketter, jyljymaly joldar tobyn uıymdastyrdyq. Barlyq ınspektorlarǵa olardyń qyzmetine qatysty naqty nusqaýlar berildi, sodan keıin olar turaqty oryndaryna bardy», - deıdi Atyraý oblystyq orman sharýashylyǵy jáne janýarlar dúnıesi aýmaqtyq ınpektsııasynyń basshysy Danııar Baımaǵambetov.
Aıta keteıik, «Bekire-2019» iri kólemdegi balyq qorǵaý aktsııasy Atyraý, Mańǵystaý jáne Batys Qazaqstan oblystarynda 31 mamyrǵa deıin jalǵasady, ol Jaıyq-Kaspıı basseıninde bekire jáne basqa balyq túrlerin saqtaý boıynsha sharalardy kúsheıtýge baǵyttalǵan.