Almatyda «Qazaqstannyń úzdik taýarynyń» jeńimpazdary anyqtaldy

ALMATY. QazAqparat - Almaty qalasynyń ákimi Baqytjan Saǵyntaev «Qazaqstannyń úzdik taýary» XIII óńirlik konkýrsynyń qorytyndysy boıynsha úzdik atanǵan kásipkerlerdi marapattady, dep habarlaıdy QazAqparat tilshisi.

Megapolıstiń óndiris oryndarynda 45 myńnan astam adam eńbek etedi. Kúrdeli ekonomıkalyq jáne jahandyq ózgeristerge qaramastan qala ónerkásibi 5,3%-ke ósken. Tek jartyjyldyqta  398,7 mlrd teńgeniń ónimi shyǵaryldy. Qala ekonomıkasy shıkizattyq emes jáne ǵylymı áleýetterge negizdelgen. Óndiristik qurylymnyń úshten ekisi ónim óńdeýmen aınalysady.

«Kóptegen zattardy biz ózimiz jasaı alamyz. Qalanyń ІJÓ 40%-y shaǵyn jáne orta bızneske tıesili, salyqtyń 50% sizderden túsedi. Biz sizderdiń kez - kelgen bastamalaryńyzǵa qoldaý kórsetýge daıynbyz»,- dedi Baqytjan Saǵyntaev.

 

2019 jyldyń  5 aıynda óńdeý ónerkásibine jumsalǵan ınvestıtsııa kólemi 14,1 mlrd teńgeni qurady.

«Biz budan bylaı da eńbek ónimdiligin arttyryp, eksportqa jáne ınnovatsııalyq damýǵa negizdelgen kásipkerlikti damytatyn bolamyz. Búgingi kúni biz kásipkerlerdi jańa ári sapaly ónimder shyǵarýǵa, modernızatsııa men tehnıkalyq jaraqtanýǵa ınvestıtsııa bólýge shaqyramyz»,- dedi qala basshysy.

Almatylyq kásipkerler «Indýstrııalandyrý kartasy», «bıznestiń jol kartasy», óńirlik «Jibek joly» baǵdarlamalary aıasynda memleket tarapynan qoldaý kórip keledi. Jergilikti ónim óndirýshiler memlekettik tapsyryspen qamtylýda.

Aldaǵy kúz aıynda «Almaty Invest 2019» forýmy ótedi, onda arnaıy ekonomıkalyq aımaqtyń ınfraqurylymdyq jaǵdaıy jáne qoldaý kórsetý tetikteri talqylanady.

Kórmeni uıymdastyrýshylar bıylǵy jyly baıqaýǵa qatysqandar arasynda ónimderdiń tehnologııalyq túrleri men servıstik blok taýarlaryn usynýshylar qatarynyń artqanyn atap ótti.

 
 
 
 

Baıqaýǵa 72 kompanııa qatysty, onyń ishinen 9 kásiporyn úzdik atanyp, respýblıkalyq baıqaýǵa joldama aldy.

Aıta ketsek, «Qazaqstannyń úzdik taýary» baıqaýy 2006 jyldan bastap ótkizilip keledi.