Qoldanýshy baptaýlary
Qoldanýshy baptaýlary
+7 (701) 759 90 19 Lenta
USD 412.55 EUR 468.66
RUB 5.79 CNY 58.80
Jańalyqtar

2017 jyl qandaı sporttyq jetistiktermen el esinde qaldy

2017 jylǵy 29 jeltoqsan 11:11 1195
Bólisińiz:
2017 jyl qandaı sporttyq jetistiktermen el esinde qaldy

ASTANA. QazAqparat - 2017 jyl Qazaqstannyń «sporttyq qorjyny» úshin qanshalyqty tabysty boldy? Qandaı sańlaqtarymyz qaı sport túrinen top jaryp, Qazaqstannyń abyroıyn kóterdi? «QazAqparat» HAA tilshisi jyldyń sporttyq jetistikterin qorytyndylap, el abyroıyn asyrǵan jeńisterge sholý jasady.

 

Qazaqstan ótkizgen 28-shi qysqy Ýnıversıada

2017 jyl qandaı sporttyq jetistiktermen el esinde qaldy 

2017 jyldyń 28 qańtary men 8 aqpany aralyǵynda ótken Almatydaǵy qysqy Ýnıversıada - sózsiz bıylǵy jyldyń eń basty sporttyq oqıǵalardyń biri bolyp qalary anyq. Sharaǵa 57 elden 2 myńǵa jýyq sportshy qatysty. Ýnıversıada barysynda 221 myń bılet satyldy.

Ýnıversıada oıyndaryna jıyny 85 medal sarapqa salyndy. Jalpy komandalyq esepte Reseı komandasy birinshi oryn alyp, olardyń enshisine 28 altyn, 27 kúmis jáne 15 qola medal buıyrdy. Ekinshi orynda - Qazaqstan quramasy. Bizdiń sportshylar baıraqty básekede 11 altyn, 8 kúmis jáne  17 qola jeńip alsa, úzdik úshtikti Ońtústik Koreıa túıindedi. Bul eldiń sportshylary Ýnıversıadanyń 11 altyny, 5 kúmisi jáne  5 qola medalin alyp ketti.

Ýnıversıadada 26 memleketke medal buıyrsa, 31 memleket birde-bir medalsyz otanyna oraldy. Qazaqstan quramasyna birinshi altyndy jarystyń úshinshi kúni bıatlonshy Alına Raıkova alyp berdi. Quramamyz sapyndaǵy mogýlshy ıÝlııa Galysheva men Dmıtrıı Reıherd Almatydaǵy Ýnıversıadada eki dúrkin jeńimpazy atandy. Sonymen qatar, bıatlonshy Galına Vıshnevskaıa da eki altyndy jeńip aldy. Nagradalar sany boıynsha shańǵyshy qyzymyz Anna Shevchenko kósh bastap, ol altyn, kúmis, qoladan - jalpy sany 5 medalmen Qazaqstannyń mereıin arttyrdy.

Qysqy Ýnıversıadadan keıin Japonııanyń Sapporo qalasynda VIII qysqy Azııa oıyndary bastalyp ketti. Qazaqstan ulttyq quramasy jalpy esepte 32 medal enshilep, (9 altyn, 11 kúmis, 12 qol) Azıadany tórtinshi orynmen aıaqtady.

 

Kásipqoı boksshylardyń baǵyndyrǵan belesteri

2017 jyl qandaı sporttyq jetistiktermen el esinde qaldy 

Ótip bara jatqan jyl kásipqoı boksshylarymyz úshin de tabysqa toly boldy dep aýyz toltyryp aıtýǵa bolady. Jyldyń basynda (11 aqpan) Janat Jaqııanov WBA jáne IBO tujyrymdary boıynsha álem chempıony atandy. Amerıkanyń Toledo qalasynda Jaqııanov pen amerıkalyq Roýshı Ýorren jeńil salmaqtaǵy WBA (Super) jáne IBO tujyrymdary boıynsha álem chempıony ataǵyn sarapqa salyp, 12 raýndyq kezdesýdiń qorytyndysy boıynsha tóreshilerdiń sheshimimen otandasymyz jeńimpaz dep tanyldy. Bul qazaqstandyqtyń kásibı rıngtegi 27-shi jeńisi edi. Alaıda arada 9 aı ótkennen keıin Jaqııanov Raıan Barnettpen bolǵan jekpe-jekke jeńil salmaqta WBA (Super) nusqasy boıynsha álem chempıony beldigin tigip, ókinishke qaraı, sol kezdesýde chempıondyq beldiginen aıyrylyp qaldy.

Aqpan aıynda qazaqtyń Qanaty brazılııalyq Robson Assısti nokaýtqa jiberip, jankúıerlerin bir qýantyp tastady. Jekpe-jek nebári bir raýndtqa sozylǵan bolatyn. Arada kóp ótpeı mamyr aıynda qaıta sharshy alańǵa kóterilgen Qanat Islam meksıkalyq Norberto Gonsalesti jeńip, boks álemindegi mártebesin nyǵaıta tústi. Qanattyń tabysy munymen shektelip qalǵan joq. Qyrkúıekte «Qazaq» kanadalyq Brendon Kýkpen Astanada umytylmas boks keshin ótkizdi. Segizinshi raýndtan keıingi kanadalyq «Jaman bala» aýyr nokdaýnǵa túsip, kelesi raýndta Qanattyń taza jeńisimen aıqasqa núkte qoıyldy.

19 naýryz qazaqstandyq jankúıerler úshin asyǵa kútken kún boldy. Sebebi, dál osy kúni Gennadıı Golovkın «boks Mekkesi» atanyp ketken Nıý-Iorktegi «Madison Square Garden» saraıynda brýklındik Denıel Djeıkobspen qolǵap túıistirgen edi. 12 raýndqa sozylǵan aıqas Genanyń aıqyn basymdyǵymen ótip, jeńis qazaqstandyq boksshynyń enshisinde qaldy. Alaıda Genanyń bul bıylǵy jyldaǵy basty kezdesýi emes-tin.

Búkil álem kútken Genanyń aıqasy 17 qyrkúıek kúni bolyp ótti. AQSh-tyń Las-Vegas qalasynda uıymdastyrylǵan boks keshinde Triple G meksıkalyq bokstyń jaryq juldyzy - Saýl «Kanelo» Alvarespen judyryqtasyp, orta salmaqtaǵy úzdikterdiń úzdigin anyqtady. 12 raýndtyq «bıg drama shoý» aqyry teń aıaqtaldy. Qazirgi ýaqytta qos boksshy 2018 jyly ótetin qarymta kezdesýge daıyndalyp jatyr.

Joǵaryda atalǵan boks sańlaqtarymen birge kásipqoı boksta Bekman Soılybaev ta sátti kele jatyr. Boksshy bıyl eki kezdesý ótkizip, ekeýinde de jeńis tuǵyrynan kórindi. Sonymen birge, 2017 jyl Fırýza Sháripova úshin de tabysty jyl dep aıtýǵa bolady. Qazaqstandyq boksshy boıjetken 26 tamyzda 10 raýndtyq kezdesýde bolgarııalyq Mılena Kolevany aıqyn basymdyqpen jeńip, WIBA jáne WBU nusqasy boıynsha álem chempıony atandy.

Kásipqoı boksta sonymen birge, Álı Ahmetov, Ivan Dychko, Jańqosh Turarov qazaq boksynyń jarqyn úlgisin kórsetip júr.

 

2017 jyl - Ulttyq sport túrleri ulyqtalǵan jyl

2017 jyl qandaı sporttyq jetistiktermen el esinde qaldy 

Astanada ótken «EKSPO-2017» halyqaralyq kórmesi ulttyq sportymyzdyń aıbynyn asqaqtatyp ketti. Halyqaralyq shara barysynda alaman báıge, jamby atý, kókpar, Álem barysy sekildi qazaqtyń ulttyq sporty túrlerinen aıtýly dodalar ótkizilip, Arqadaǵy toıdy qyzdyra tústi. Shildede ótken Elbasy júldesine arnalǵan «EKSPO» kýbogynda 2400 metrlik ushqyr báıgeniń sáıgúlikter jarysynda «Karneý» atty jıren aıǵyr aldyna qara salmady. Osylaısha, sonaý Daǵystannan at arytyp kelgen Zaınal Salaýtdınov bas júlde - Kýbok pen 50 myń dollardy ıelenip, mereıi ústem boldy. Odan keıingi 25 shaqyrymdyq alaman báıgede «Elvýd veb» atty kúreń jorǵa shashasyna shań juqtyrmady. Iesi - Aqmola oblysynyń atbegisi  D.Volkov «EKSPO kýbogi» men 1,2 mıllıon teńgeni ıelendi.

Al EKSPO kýbogyndaǵy «Qunan báıge» jarysynda «Doran» atty tory qunan eshkimge ese bermeı, (ıesi - A.Jumabekov, Almaty oblysy) «EKSPO» kýbogy men 3 mıllıon teńgege qol jetkizdi.

Budan keıin «Qazanat» atshabarynda jamby atýdan «Altyn jebe» halyqaralyq týrnıri uıymdastyrylyp, Rýmynııadan kelgen Mıhaıl Kýzmı bas júldeni (2 mln teńge) qanjyǵasyna baılady. 2 oryn men 1 mln teńge qazaqstandyq sportshy Sarybaı Aıtbektiń enshisinde qalsa, 3 oryn jáne 700 myń teńgeni Eralhan Aıkóz  ıelendi. Tórtinshi oryn men 400 myń teńge Majarstannan kelgen Nemotı Krıstof Arpadqa buıyrdy. Bestikti Malaızııa sportshysy Muhamed Akmal bın Mohamed Dakalan túıindedi. Oǵan 200 myń teńge buıyrdy.

Tamyzdyń sońyn ala Astanadaǵy «Qazanat» atshabary taǵy da dúbirge toldy. Bul joly álemniń 10-nan astam elinen kelgen kókparshylar Arqada Kókpardan álem chempıonaty oıynynyń kórkin qyzdyrdy. Ol kókpardyń artyqshylyǵy - sonaý Amerıkadan kovboılardyń at arytyp kelgeni edi. Tuńǵysh kókpar chempıonatynyń fınalynda Qazaqstan quramasy Qyrǵyzstandy 4:1 esebimen jeńip, Álem chempıony atandy. Al tartysty chempıonattyń qola júldesin Tájikstan komandasy utyp aldy.

 

Qazaq kúresiniń aıbyny qaryshtaǵan jyl

2017 jyl qandaı sporttyq jetistiktermen el esinde qaldy 

Qazaqstandyqtardyń kópten kútken iri saıystarynyń biri - «Qazaqstan Barysy» edi. Aıtýly jarystyń sáni de, dámi de - bir jylda bir ret qana uıymdastyrylatyndyǵynda. Buǵan deıin de «Qazaqstan barysy» atanǵan kil myqtylar boz kilemge shyqqanymen, eldegi basty ataq - Ásker barysy Elaman Erǵalıevke buıyrdy. Elaman aqtyq saıysta Almaty oblysynyń ókili Ulan Rysqulmen shyǵyp, qarsylasyn qapy qaldyrdy. Aıtýly dodanyń qola medalin Aıbek Nuǵymarov mise tutty. Jarys qorytyndysy boıynsha birinshi oryndy jeńip alǵan Elaman Erǵalıev 25 mıllıon teńgeni jáne altyn belbeý men altyn taıtuıaqqa ıe boldy. Arada kóp ótpeı Qyzylorda oblysynyń ákimi Qyrymbek Kósherbaev «Qazaqstan barysy» atanǵan Elaman Erǵalıevke eki bólmeli páterdiń kiltin tabys etti.

8 qyrkúıek - Qazaq kúresi úshin taǵy da bir aıtýly kún desek te bolady. Sebebi, dál osy kúni álemniń 40-qa jýyq eliniń balýandarynyń basyn qosqan «Álem barysy» saıysy uıymdastyrylǵan bolatyn.

«Álem barysy» ataǵy «Álem barysy» ótken Qazaqstanda qaldy. Dodanyń aqtyq saıysynda qazaqstandyq Aıbek Nuǵymarov pen grýzııalyq Gýram Týshıshvılı kezdesti. Tartysty beldesýde Aıbek Nuǵymarov grýzııalyqty taza jeńdi. Úshinshi oryn taǵy bir qazaqstandyq balýan Erjan Shynkeevtiń enshisinde qaldy. «Álem barysy» atanǵan Aıbek Nuǵymarovqa 15 mıllıon teńge tabystaldy.

Jyldyń sońyn ala Qazaqstannyń Táýelsizdigi kúni Almatyda «Eýrazııa barysy» ótkizildi. Fınalda «Qazaqstan 1» quramasy men Almaty oblysynan quralǵan «Qazaqstan 2» komandalary arasyndaǵy asa tartysty ótken beldesý «Qazaqstan 1» jeńisimen aıaqtaldy.

  

Astanada tuńǵysh ret ótken halyqaralyq marafon

2017 jyl qandaı sporttyq jetistiktermen el esinde qaldy 

Elordadaǵy «EKSPO-2017» halyqaralyq mamandandyrylǵan kórmesimen tuspa-tus 27 tamyz kúni Halyqaralyq marafon ótken bolatyn. 5 myńǵa jýyq adam qatysqan jarys úsh qashyqtyq boıynsha uıymdastyryldy. ShYU men Azııadaǵy ózara yqpaldastyq jáne senim sharalary jónindegi keńestiń qoldaýymen ótken marafonda 2017 metr men 10 shaqyrymnan bólek, eń uzaq - 42 shaqyrymdyq qashyqtyqta kásibı sportshylar baq synasty.

Halyqaralyq marafonnyń 42 shaqyrymdyq synynda Ózbekstan elinen kelgen 31 jastaǵy Andreı Petrov máre syzyǵyn birinshi kesti. Ózbekstandyq marafonshynyń sońynan Belarýs eliniń júırigi Vladıslav Prıamov kelip ekinshi oryndy ıelendi. Úshinshi oryn Kenııadan kelgen Týveı Tıtýsqa (3000 AQSh dollary) buıyrdy.

 

Shahmat sheberleriniń shyqqan shyńy

2017 jyl qandaı sporttyq jetistiktermen el esinde qaldy 

Qazaqstannyń shahmatyn qazirgi tańda qos myqty - Dınara Sádýaqasova men Jansaıa Ábdimáliksiz elestetý múmkin emes. Aqyl oınynyń asqan sheberleri Ashhabadta ótken V Azııa oıyndarynda Qazaqstannyń qorjynyna eki birdeı altyn medal salǵan bolatyn. Dınara qazirgi tańda álemdik reıtıngte 23-shi orynda. Sonymen qatar, jýyqta «Asian Chess Excellence Awards» syılyǵyn tapsyrý rásiminde qazaqstandyq grossmeıster Dınara Sádýaqasova Azııanyń 2017 jyldaǵy eń úzdik shahmatshysy atandy.

Jansaıanyń da bıylǵy jyly baǵyndyrǵan asýlary barshylyq. Aǵymdaǵy jyldyń qarasha aıynda shahmatshynyń tasy órge domalap, 20 jasqa deıingi jasóspirimder arasynda shahmattan álem chempıonatynda jeńiske jetti. Týrnır Italııanyń kýrort qalasy - Tarvızıoda (World Junior and Girls Under 20 Chess Championship 2017) ótken bolatyn. Buǵan qosa bıyl 17 jastaǵy Jansaıa International Master (erler arasyndaǵy halyqaralyq sheber) ataǵyn alyp otyr.

Qos myqtynyń izin qyzylordalyq Ásel Serikbaı atty taǵy bir shahmatshy basyp kele jatyr. Rýmynııanyń ıAssy qalasynda shahmattan oqýshylar arasynda ótken Álem chempıonatynda qazaqstandyq sportshylar tabysty óner kórsetip, Ásel álem chempıony atandy.

 

Tyń deńgeıdegi - qazaqstandyq paralımpıada

2017 jyl qandaı sporttyq jetistiktermen el esinde qaldy 

2016 jyly ótken Rıodaǵy Paralımpıada oıyndarynda Qazaqstan quramasynyń qorjynyna alǵashqy altyn medaldi salǵan Zýlfııa Ǵabıdýllına bıyl da jeńisti jolyn jalǵastyrdy.

Zýlfııamen birge qaraǵandylyq Natalıa Zvıagıntsevanyń jetistigi jeterlik. Jeltoqsannyń orta sheninde Meksıkada ótken sýda júzý sportynan múmkindigi shekteýli sportshylar arasyndaǵy Álem chempıonatynda Natalıa Zvıagıntseva 50 metr qashyqtyqqa shalqalap júzý boıynsha birinshi oryndy ıelendi. Atalǵan saıysta qaraǵandylyq taǵy bir júzýshi Andreı Afanasev brass ádisimen 10 metrlik dıstantsııany júzip ótip, úshinshi oryn alǵan edi.

Aıta keterligi, Əlem birinshiliginde qazaqstandyq Natalıa Zvıagıntseva paralımpıadalyq júzý sporty boıynsha altyn medal ıelengen bolatyn. Arqamen júzý boıynsha 50 metrlik qashyqtaǵy Natalıanyń jetistigi - Qazaqstan tarıhyndaǵy álem chempıonatynda alǵan tuńǵysh altyn medal ekenin aıta ketý kerek.

Qaraǵandylyqtarmen birge paralımpıadadan atyraýlyq sańlaqtardyń da qarqyny myqty. Shilde aıynda Germanııa ótken ashyq chempıonatta atyraýlyq sportshy-paralımpıadashy Erjan Sálimgereev 100 metrlik qashyqtyqta sýda júzýden jáne krol ádisimen 50 metrlik  qashyqtyqta júzý jarystarynda eki altyn medal jeńip aldy.

 

«Astana» fýtbol komandasynyń tarıhı jeńisi 

2017 jyl qandaı sporttyq jetistiktermen el esinde qaldy 

Jyldyń sporttyq eń aıtýly oqıǵalarynyń ishinde «Astana» fýtbol komandasynyń el tarıhynda tuńǵysh ret Eýropa Lıgasynyń pleı-off kezeńine shyǵýyn erekshe aıta ketýge bolady. Pragadaǵy «Eden Arena» stadıonynda ótken Eýropa Lıgasy toptyq kezeńiniń altynshy týrynda «Astana» komandasy «Slavııamen» kezdesip, Stanımır Stoılovtyń shákirtteri 1:0 esebimen tarıhı jeńiske qol jetkizdi.

11 jeltoqsan kúni ÝEFA-nyń shtab-páterinde Eýropa Lıgasynyń 1/16 fınalynyń jerebesi tartyldy. Jerebe qorytyndysy boıynsha, «Astana» portýgalııalyq «Sportıngpen» baq synasatyn boldy. Aıta keterligi, Eýropa Lıshasynda 32 komanda ózara myqtyny anyqtamaq. Atap aıtqanda, «Astana» fýtbol komandasy, «Borýssııa» (Germanııa), «Atlanta» (Italııa), «Nıtstsa» (Frantsııa), «Lokomotıv» (Reseı), «Kopengagen» (Danııa), «Atletıko» (Ispanııa), «Spartak» (Reseı), «Atletık» (Ispanııa), «AEK Afına» (Grekııa), «Dınamo» (Ýkraına), «Seltık» (Shotlandııa), «Zenıt» (Reseı), «Napolı» (Italııa), «RB Leıptsıg» (Germanııa), «Tsrvena Zvezda» (Serbııa), «TsSKA» (Reseı), «Lıon» (Frantsııa), «Vılıarreal» (Ispanııa), «Real Sosedad» (Ispanııa), «Zaltsbýrg» (Avstrııa), «Partızan» (Serbııa), «Vıktorııa Plzen» (Chehııa), «Stıaýa» (Rýmynııa), «Latsıo» (Italııa), «Lýdogorets» (Bolgarııa), «Mılan» (Italııa), «Sportıng» (Portýgalııa), «Estersýnd» (Shvetsııa), «Arsenal» (Anglııa), «Olımpık» (Frantsııa), «Braga» (Portýgalııa) komandalary Eýropa Lıgasynyń chempıondyǵyna talasady.

 

Mánerlep syrǵanaýdan qyzdar arasynda tuńǵysh ret Qysqy Olımpıada oıyndaryna joldama alǵan - Elızabet Tursynbaeva

2017 jyl qandaı sporttyq jetistiktermen el esinde qaldy 

Qazaqstannyń mánerlep syrǵanaýshysy Elızabet Tursynbaeva Fınlıandııa eliniń astanasy Helsınkıde ótken álem chempıonatynda qysqa jáne erkin baǵdarlama qorytyndysy boıynsha 9-shy oryn aldy. Bir estigende 9-shy oryn aýyz toltyryp aıtarlyqtaı jetistik sekildi estilmeıdi. Alaıda Elızabettiń bul jetistigi - alǵash ret qysqy Olımpıada oıyndaryna joldama ákelip otyr. Osyǵan deıin elimizdiń atynan tórtjyldyqtyń basty dodasyna birde-bir qazaqstandyq mánerlep syrǵanaýshy arý qatyspaǵan.

Elızabettiń bıylǵy jetistigi munymen shektelip qalmaıdy. Aǵymdaǵy jyldyń sáýir aıynda Elızabet Shanhaıda ótken Shanghai Trophy týrnıriniń kúmis júldegeri boldy. Al qazan aıynda Belarýs astanasy Mınsk qalasynda 12 elden 20 mánerlep syrǵanaýshy qatysqan «Ice Star Minsk» halyqaralyq týrnırinde altyn júldeni ıelenip, elimizdiń týyn kókke kóterdi.

Elızabet 2018 jyly Ońtústik Koreıada ótetin Qysqy Olımpıadada el namysyn qorǵaıdy.

 

Alda - Ońtistik Koreıada ótetin Qysqy Olımpıada oıyndary

2017 jyl qandaı sporttyq jetistiktermen el esinde qaldy 

Qysqy sport túrleri boıynsha Qazaqstan ulttyq quramasy Ońtústik Koreıada ótetin Phenchhandaǵy Qysqy Olımpıada oıyndaryna qatysý úshin 33 lıtsenzııa alyp otyr. Naqtyraq aıtqanda, short-trekten 10, bıatlonnan 10, konkımen júgirýden - 10 jáne mánerlep syrǵanaýdan 3 joldama qazaqstandyq sportshylardyń qorjynynda.

Short-trekten erler arasynda Nurbergen Jumaǵazıev (500 m, 1 000 m jáne 1 500 m), Abzal Ajǵalıev (500 m), Denıs Nıkısha (500 m) jáne qyzdar arasynda Iong Kım (500 m, 1 000 m jáne 1 500 m), Anastasııa Krestova (1 000 m jáne 1 500 m) qatarly sportshylar Qysqy Olımpıadada Qazaqstannyń týyn ustap shyǵady.

Al Olımpıada el namysyn qorǵaıtyn bıatlonshylardyń esimi qańtarda belgili bolmaq. Al konkımen júgirý sport túrinen Denıs Kýzınnen, Ekaterına Aıdova, Fedor Mezentsev, Roman Krech, Stanıslav Palkın syndy tanymal konkıshiler álemdik dodaǵa daıyndyq júrgizip jatyr.

Bizdiń kanalymyzǵa jazylyńyz:

Basty sózder: Sport, Jyl qorytyndysy,
Bólisińiz:

Avtor:

Aıan Bekenuly

Zagrýzka...
Pikir qaldyrý
+7
Jiberý
ONLAIN QYZMETKERLER
MURAǴAT