+7 (701) 759 90 19 Лента
8 °С : استانا
17 °С : الماتى
USD 421.58 EUR 496.83
RUB 5.53 CNY 62.20
جاڭالىقتار

ەرتە ۇيلەنگەن جىگىتتىڭ جان سىرى

9 قاراشا 12:00 287
:ءبولىسۋ
ەرتە ۇيلەنگەن جىگىتتىڭ جان سىرى

استانا. قازاقپارات - جىگىت رەتىندە سىر اقتارىپ وتىرعانىم دا ءبىرتۇرلى بولار. ءبىراق سىر قىزدىڭ دا، جىگىتتىڭ دە ىشىندە بار. ەندەشە ول ورتاق نارسە. سوندىقتان وسى سايتتى پايدالانا وتىرىپ ءبىر جايدى بايانداسام.

بالالىق دەيمىز... ءبىراق بالالىقتىڭ قاتەلىگىن كەيىن تۇسىنەمىز. ويتكەنى ءوزىمىز بالا بولىپ ءجۇرىپ ونىڭ قادىرىن نە كەمشىلىگىن قايدان بىلەمىز. قازىر ۋنيۆەرسيتەتتىڭ 3- كۋرسىندا ءبىلىم الىپ جاتىرمىن. تاڭ قالۋىڭىز دا مۇمكىن، ءبىراق بالام بار. ايەلىم جوق. ايەلىم بولعان، كەتىپ قالدى. تۇسىنىكتى بولۋ ءۇشىن باسىنان باستايىن...

ونىنشى سىنىپ وقىپ جۇرگەن كەزىم. اينۇر ەسىمدى قىزعا عاشىق بولدىم. ءتىپتى جاقسى كورگەنىم سونشا، العاشقى ماحاببات بولعان سوڭ با سەزىمگە ماس بولدىم. ونسىز ءومىر جوق سەكىلدى. قىزعانشاقتىعىم تاعى بار.

دوستارىممەن جۇرسە دە سىرتتاي قىزعانامىن. ءبىراق جازعى ءۇش ايلىق دەمالىسقا شىققان كەزدە ول قىزعا كوڭىلىمدى ايتتىم. ول دا كەت ارى بولماعان سوڭ «ءجۇرۋ» دەيتىن ماحابباتتىڭ جەڭىل ءبىر ۇعىمىن باستان كەشتىم. سەزىم شىركىن سول بالا كۇندە ولمەيدى ەكەن. كۇندە عاشىق بولامىن. ءبىر قىزعا. اينۇرعا!

اقىرى تۇلەك اتانار كۇن تۋىپ، ون ءبىرىنشى سىنىپتىڭ تامىز ايىندا ەشتەڭەگە قاراماستان كوزدى جۇمىپ تۇرىپ ۇيلەنىپ الدىم. ءبىز باقىتتىمىز. ءبىز شىنىمەن باقىتتىڭ جولىنا ساپار شەكتىك. العاشقى ءبىر جىل اتا-انام كومەكتەسىپ تۇردى. جەگەنىم الدى ىشكەنىم ارتتا نە كەرەك، ءبارى قىزىق ەدى.

تەك اينۇر قاسىمدا بولسا دەگەن وي بولدى. اينالىپ كەلگەندە جاستىمىز. ءبىراق ماحابباتتىڭ جاسقا قارامايتىنىن سول كەزدە ەكەۋىمىز دە بىلدىك. تەك مەن ءبىلدىم بە...

قول ۇستاسقان قوس عاشىق بولىپ ەكەۋىمىز بىرگە وقۋعا تۇستىك. ءبىرىنشى كۋرستىڭ سوڭىنا قاراي ۇيىمدە شاتتىق ورنادى. اتا-اناما نەمەرە سىيلادىم. ماڭدايى جارىق ۇلىم دۇنيەگە كەلدى. ەسىمى - بەيبارىس.

قىلىعى ءتاتتى بالامىزدىڭ قاسىنان ەكى ەلى شىقپايمىز. جۇمىس جوق. وقۋمەن عانا ءجۇردىم. ايەلىم اقىرىن-اقىرىن مەنەن سۇرانىپ دالاعا شىعىپ كەلۋدى، قالاعا كەلگەندە تانىسقان قۇربىلارىمەن قىدىرۋدى شىعاردى. كەلىستىم. قالاي كەلىسپەيىن ۇلىمنىڭ اناسى عوي.

ارادا ەكى اي وتكەن كەزدە مەن اينۇردى تانىماي قالدىم. مىنەز شىعارا باستادى. باستى سەبەپ - اقشانىڭ جەتىسپەۋى ەدى. قاشانعى اتا-اناما جالىنىپ اقشا سۇرايمىن. ءوز كۇنىمدى ءوزىم كورگىم كەلدى. ءبىراق جۇمىسقا ورنالاسا المادىم. «انانى الىپ بەر، مىنان الىپ بەر» دەيتىن دۇنيەلەر كوبەيدى.

بالانى ۇيگە اپارىپ تاستادىق. ەكەۋىمىز بولىپ قايتادان ءومىر باستاماق بولدىق. ءبىراق ەشەتەڭە شىقپادى. تۇسىنگەنىم ەرتە ۇيلەنىپ قويدىم-اۋ دەيمىن. الدە ايەلىم كوپ قىدىرىپ ءجۇرىپ بۇزىلدى ما، ويىن قاي سايتان كەلىپ ءتۇرتتى ەكەن... قىسقاسى سەزىمنىڭ ارتى اشۋ مەن جان-جالعا ۇلاستى.

سول كۇن ءالى ەسىمدە. سوڭعى سويلەسكەن، ۇرىسقان كۇنىمىز. سونداعى ايەلىمنىڭ ارىزى مەن ەر بولىپ جارىماپپىن، اقشام جوق، ونى باعا الماعانمىن. ال ونىڭ قۇربىلارى ءالى تۇرمىس قۇرماسا دا جىگىتتەرى كۇندە سىيلىق جاسايتىن كورىنەدى. ال مەن كۇيەۋى بولىپ ايەلىمە سولارداي جاعداي جاساي الماپپىن.

ءومىردىڭ ىستىعى مەن سۋىعىنا ەرتە كۇيىپ جەتىلەم دەپ جۇرگەندە، ويىمدى وزگەرتكەن وسى سوزدەر جانىمدى جەگىدەي جەدى. اقىرى ايەلىم مەنەن كەتەمىن دەپ شۋ شىعاردى. وتباسى بولىپ توقتاتا المادىق.

ونىڭ دا اتا-اناسى قىزدارىن جاقتاپ وتىرىپ الدى. ەڭ اقىرى ماحابباتقا باسىم كەتىپ، جۇرەكپەن ويلانىپ ءجۇرىپ اقىلىمدى ۇمىتىپ كەتتىم. اقىلعا سالۋدى ۇمىتتىم. نە كەرەك ەكى جاققا كەتىپ تىندىق. ءبىراق بالانى وزىڭە قالدىر دەگەنى ءتىپتى قابىرعامدى سوگىپ كەتتى. قانداي انا؟!

بولار ءىس بولىپ، بوياۋى ءسىڭدى. دەگەنمەن ءبىر تۇسىنگەنىم مىناۋ، ماحابباتتى جۇرەكپەن عانا قابىلداۋ ازدىق ەتەدى. ونى اقىلعا سالىپ ويلانۋ كەرەك ەكەن. شاڭىراق قۇرۋ ءۇشىن دە كوزسىز باتىرلىق ەمەس، اقىل مەن پاراساتتىڭ تۇيىسكەن جەرىن ۇستاۋ كەرەك.

مەنىڭشە، وسى دۇرىس. مەكتەپ بىتىرە سالىپ ۇيلەنەمىن، ءۇي بولىپ كەتەمىن دەيتىن جىگىتتەر قىزدىڭ بولاشاعىڭىز ءۇشىن ماڭگىلىك كەپىل بولاتىنىنا كوز جەتكىزىڭىز. بۇل ايدان الىپ وتىرعانىم ەمەس، تاجىريبەدەن تۇيگەن اقيقاتىم.

اۆتور: التىنبەك

massaget.kz


باستى سوزدەر: قوعام, جاستار ءومىرى ,
:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
مۇراعات